𝐓𝐡𝐞 𝐑𝐢𝐝𝐞𝐫 𝐭𝐚𝐫𝐨𝐭 𝐃𝐞𝐜𝐤 - რაიდერის ტარო

არტურ ედუარდ უეიტის ტაროს დასტა უკვე 100 წელზე მეტია, რაც აქტიურად გამოიყენება ტაროლოგების პრაქტიკაში. იმის მიუხედავად, რომ ის დიდწილად განსხვავდება სხვა უფრო ძველი ტაროებისგან, შექმნისთანავე ძალიან სწრაფად გავრცელდა ევროპაში და დღემდე ერთ-ერთ ყველაზე პოპულარულ დასტად ითვლება მსოფლიო მასშტაბით.

უეიტმა მთელი თავისი ცხოვრება მისტიკის, ოკულტური მეცნიერებების და უძველესი მაგიური ცოდნის შესწავლას დაუთმო. ის იყო ორდენ „ოქროს განთიადის“ წევრი და ამ ორდენში დიდ წარმატებასაც მიაღწია. მან მიზნად დაისახა შეექმნა ტაროს ისეთი დასტა, რომელსაც მეტი საერთო ექნებოდა თანამედროვეობასთან და მისი თანამედროვე ადამიანები ადვილად გაიგებდნენ.

თავად უეიტს არ ჰქონდა ფერწერის ნიჭი, ამიტომ თანაავტორობა ამერიკელ მხატვარს, პამელა კოლმან სმითს შესთავაზა, რომელიც ასევე ორდენ „ოქროს განთიადის“ წევრი იყო. უეიტმა მოიფიქრა თითოეული დეტალი, რომლებიც აერთიანებდა სხვადასხვა მისტიკურ სიმბოლიკას და რომლებიც კარტზე უნდა ყოფილიყო დატანილი, ხოლო პამელამ მათ სიცოცხლე შესძინა – 78 არკანის სახით. თუმცა ისე გამოვიდა, რომ მისი სახელი არ მოხვდა დასტის ტრადიციულ სახელში. თანაავტორის სტატუსი უილიამ რაიდერმა მოიპოვა, რომელმაც გამოსცა პირველი დასტა 1910 წელს.

არ დაგავიწყდეთ რომ ეს დასტა საკმაოდ მნიშვნელოვანი და განსაკუთრებულია. მას შეუძლია ადამიანს დაელაპარაკოს და ბევრი მინიშნება მისცეს. ტაროს დიდი ძალა გააჩნია და შეუძლია ადამიანის საუკეთესო მეგობარი და მრჩეველი გახდეს, თუ სათანადოდ მოეკიდებით და ყურადღებით დაიწყებთ მათ შესწავლას.